بھارت کی پہلی ’اے آئی اداکارہ‘ کا اے آئی سے تخلیق شدہ ڈرامے میں ڈیبیو – Life & Style

بھارت کی تفریحی دنیا میں مصنوعی ذہانت نے ایک اور سنگِ میل عبور کر لیا ہے، کیونکہ ملک کی پہلی اے آئی اداکارہ نینا اوتار نے اپنے پہلے مائیکرو ڈرامے ”ٹروتھ اینڈ لائیز“ کے ذریعے اداکاری کا آغاز کر دیا ہے۔ یہ ڈراما 21 اکتوبر 2025 کو انسٹاگرام ریلز پر جاری ہوا۔

کہانی ممبئی کی ایک رات کے پس منظر میں ترتیب دی گئی ہے اور اس میں دوستی، دھوکہ اور اعتماد جیسے موضوعات کو ایک منٹ کی مختصر قسطوں میں پیش کیا گیا ہے۔ ڈراما خواتین کی ایک ٹیم نے تخلیق کیا ہے۔

فیک تصاویر اور ویڈیوز کے نقصانات سے کیسے بچا جاسکتا ہے؟

نینا اوتار صرف ایک ڈیجیٹل کردار نہیں، بلکہ اسے انسانی جذبات، ثقافت اورکہانیوں کو سمجھنے اور دکھانے کے لیے بنایا گیا ہے۔ وہ انسانی اداکاروں کے ساتھ اسکرین پر نظر آتی ہیں، جہاں نگاہوں کے زاویے اور روشنی کو ہم آہنگ کیا جاتا ہے تاکہ ہر منظر حقیقت کے قریب محسوس ہو۔

اس سیریز میں اے آئی، 3ڈی ٹیکنالوجی اور حقیقی وقت کی کہانی سنانے کی تکنیک کا امتزاج کیا گیا ہے اور ہر قسط کو نشر کرنے سے پہلے اخلاقی معیار کے مطابق جانچ بھی لیا جاتا ہے۔

اوتر میٹا لیبز کے شریک بانی اور سی ای او ابھشیک رازدھن کے مطابق نینا اوتر کی تخلیق کا مقصد صرف ڈیجیٹل ماڈل تیار کرنا نہیں بلکہ ایک ایسی شخصیت تخلیق کرنا تھا جو جذبات اور سماجی حساسیت کو سمجھ سکے۔ رازدھن کے مطابق، نینا میں جذبات، انسانی خامیاں، مزاح اور تعلق پیدا کرنے کی صلاحیت شامل کی گئی ہے تاکہ وہ حقیقی اور قابلِ ربط محسوس ہو۔

دنیا کا مصنوعی ذہانت پر مبنی پہلا بڑا سائبر حملہ

نینا اوتر عالمی اے آئی کرداروں سے اس لحاظ سے مختلف ہیں کہ وہ صرف ٹیکنالوجی پر مبنی نہیں بلکہ جذباتی گہرائی اور ثقافتی ربط پر بھی توجہ دیتی ہیں۔ نینا خود کہتی ہیں،
”میں انسانوں کی جگہ لینے نہیں آئی، بلکہ انہیں ایک ایک جذبات کے ذریعے دکھانے کے لیے موجود ہوں۔“

یہ ڈراما بھارتی ناظرین کے لیے ایک نئے انداز کی کہانی سنانے کا موقع فراہم کرتا ہے، جہاں ڈیجیٹل کردار بھی حقیقی اور جذباتی طور پر قابلِ ربط محسوس ہوتے ہیں۔

مائیکرو ڈراما ”ٹروتھ اینڈ لائیز“ کی نئی اقساط باقاعدگی سے نینا اوتر کے آفیشل انسٹاگرام پیج پر جاری کی جا رہی ہیں اور یہ نئی ٹیکنالوجی مستقبل میں مزید دلچسپ اور جذباتی تجربات کے لیے راہ ہموار کر رہی ہے۔