وفاق نے پولیس کو ناقص اور پرانی بلٹ پروف گاڑیاں فراہم کیں: وزیراعلیٰ خیبر پختون خوا کا دعویٰ – Pakistan

وزیراعلیٰ خیبرپختونخوا سہیل آفریدی نے وفاقی وزارتِ داخلہ کی جانب سے صوبائی پولیس کو فراہم کی جانے والی ناقص اور پرانی بلٹ پروف گاڑیوں کو مسترد کرتے ہوئے انہیں واپس کرنے کی ہدایت کی ہے۔

وزیراعلیٰ نے کہا کہ وفاقی وزیرِ داخلہ کا یہ اقدام خیبرپختونخوا پولیس کی تضحیک کے مترادف ہے۔ انہوں نے سیکیورٹی کے حوالے سے اپنے پہلے باضابطہ اجلاس کی صدارت کے دوران یہ احکامات جاری کیے۔

اجلاس میں وزیراعلیٰ نے سابق وزرائے اعلیٰ کو دوبارہ سیکیورٹی فراہم کرنے کی ہدایت بھی کی۔ ان کا کہنا تھا کہ گزشتہ سال آٹھ فروری کو عوامی مینڈیٹ پر ڈاکہ ڈالنے کی کوشش کی گئی، تاہم عوامی طاقت کو تسلیم کرنا ہوگا۔

سہیل آفریدی نے کہا کہ عام انتخابات کے دوران عوام کے ساتھ کھڑے ہونے والے سرکاری حکام کو اعزازات سے نوازا جائے گا۔

اس سے قبل، نومنتخب وزیراعلیٰ خیبرپختونخوا سہیل آفریدی کی زیرصدارت صوبائی کابینہ کا پہلا اجلاس ممنعقد ہوا جس میں ضم شدہ اضلاع کے لیے اہم ترقیاتی منصوبوں کا اعلان کیا گیا۔

دوران اجلاس وزیراعلیٰ نے ٹرائبل میڈیکل کالج، ٹرائبل یونیورسٹی آف ماڈرن سائنسز اور شہید ارشد شریف کے نام سے یونیورسٹی آف انویسٹیگیٹیو اینڈ ماڈرن جرنلزم کے قیام کا اعلان کیا۔ اس کے ساتھ تمام اضلاع میں پلے گراونڈز بنانے اور سیف سٹی پراجیکٹ کے آغاز کی منظوری بھی دی گئی۔

اجلاس میں گڈ گورننس روڈ میپ پر پیشرفت، امن و امان کی صورتحال، اور انسدادِ بدعنوانی کے اقدامات کا تفصیلی جائزہ لیا گیا۔

نومبر احتجاج: علیمہ خان کے تیسری بار ناقابل ضمانت وارنٹ جاری، گرفتار کرکے پیش کرنے کا حکم

وزیراعلیٰ سہیل آفریدی نے کہا کہ عوام کے مینڈیٹ پر ڈاکا ڈالنے کی کوشش کی گئی، لیکن صوبائی افسران نے جمہوری مینڈیٹ کے تحفظ میں اہم کردار ادا کیا۔ ان افسران کو ایوارڈ دینے کا اعلان کیا گیا جبکہ عوامی مفاد کے خلاف جانے والے افسران کے خلاف کارروائی کا عندیہ دیا گیا۔

سہیل آفریدی نے واضح کیا کہ صوبے میں کرپشن کے خلاف زیرو ٹالرنس پالیسی اپنائی گئی ہے، کسی کو کرپشن کی اجازت نہیں ہوگی۔ انہوں نے کہا کہ سرکاری ملازم اور حکومت سب عوام کے خادم ہیں، اور جو افسر عوامی اعتماد پر پورا نہیں اترے گا وہ اپنے عہدے پر برقرار نہیں رہے گا۔

وزیراعلیٰ نے کہا کہ وہ روایتی انداز میں کام کرنے کے لیے نہیں آئے بلکہ عوام کو حقیقی تبدیلی کا احساس دلانے کے لیے اقدامات کیے جائیں گے۔ انہوں نے ہدایت دی کہ صوبے میں رٹہ سسٹم کے خاتمے کے لیے کانسیپچوئل ایگزامینیشن سسٹم متعارف کرایا جائے۔

پی ٹی آئی پاک افغان تعلقات کو صرف اپنے کاروبار کے تناظر میں نہ دیکھے: خواجہ آصف

مزید برآں، وزیراعلیٰ نے واضح کیا کہ صوبے میں کسی بھی سیاسی مقدمے یا تھری ایم پی او کے تحت گرفتاری نہیں کی جائے گی۔ اجلاس میں فیصلہ کیا گیا کہ ضم اضلاع کی تعمیر و ترقی کو ترجیحی بنیادوں پر آگے بڑھایا جائے گا تاکہ وہاں کے عوام کو تعلیم، صحت اور روزگار کے بہتر مواقع فراہم کیے جا سکیں۔