ایشیا کپ سپر فور: پاکستان کی شاندار بولنگ، سری لنکا نے 6 وکٹوں پر 105 رنز بنالیے – Sports

ایشیا کپ ٹی 20 ٹورنامنٹ کے سپر فور مرحلے کے تیسرے میچ میں سری لنکا کی پاکستان کے خلاف بیٹنگ جاری ہے، سرلنکن ٹیم نے 17 اوورز میں 6 وکٹوں کے نقصان پر 105 رنز بنالیے ہیں۔

ابوظہبی کے شیخ زاہد کرکٹ اسٹیڈیم میں کھیلے جانے والے ایشیا کپ سپر فور مرحلے کے تیسرے مقابلے میں سری لنکن ٹیم مشکلات کا شکار ہے، میچ میں 58 رنز پر سری لنکا کی آدھی ٹیم پویلین واپس لوٹ چکی ہے۔

کپتان چریتھ اسالانکا 20، کوسال پریرا 15 اور پاتھم نیسانکا 8 رنز بنا کر آؤٹ ہوئے جب کہ کوشال مینڈس اور داسن شناکا کھاتہ بھی کھول نہ سکے۔

اس وقت کمیندو مینڈس 41 اور چمیکا کرونارتنے 2 رنز کے ساتھ وکٹ پر موجود ہیں۔

پاکستان کے شاہین شاہ آفریدی اور حسین طلعت نے 2،2 وکٹیں حاصل کیں جب کہ ابرار احمد اور حارث رؤف نے ایک کھلاڑی کو آؤٹ کیا۔

ابو ظہبی کے شیخ زید اسٹیڈیم میں ایشیا کپ 2025 کے سپر فور مرحلے کے اہم میچ میں آج پاکستان اور سری لنکا کی ٹیمیں مدمقابل ہیں، جہاں میچ کا ٹاس پاکستان کے کپتان سلمان علی آغا نے جیت کر پہلے سری لنکا کو بیٹنگ کی دعوت دی ہے اور سری لنکن بیٹنگ لائن کو ابتدائی اوورز میں دباؤ میں لانے کی حکمت عملی اپنائی ہے۔

ٹاس کے بعد پاکستانی کپتان سلمان علی آغا کا کہنا تھا کہ ٹیم نے بھارت کے خلاف اننگز کے دوسرے حصے میں بیٹنگ اچھی نہیں کی، یہ نیا گیم ہے وہ ماضی کے متعلق نہیں سوچ رہے۔

سری لنکا کے کپتان نے کہا کہ اگر ہم ٹاس جیت جاتے تو پہلے فیلڈنگ ہی کرتے۔

پاکستان نے آج کے میچ کے لیے اپنی ٹیم میں کوئی تبدیلی نہیں کی، بھارت کے خلاف میچ کھیلنے والے کھلاڑی ہی پلیئنگ الیون کا حصہ ہیں۔

پاکستان کے خلاف اہم مقابلے کے لیے سری لنکن اسکواڈ میں 2 تبدیلیاں کی گئی ہیں، کامل مشہارا او دونتھ ویلا لاگے کی جگہ مہیش تھکشانا اور چمیکا کرونا رتنے کو شامل کیا گیا ہے۔

قومی اسکواڈ کی قیادت سلمان علی آغا کر رہے ہیں جب کہ دیگر کھلاڑیوں میں فخرزمان ، صاحبزادہ فرحان، صائم ایوب ، حسین طلعت اور محمد نواز شامل ہیں، فہیم اشرف ، محمد حارث ، شاہین آفریدی، حارث رؤف اور ابرار احمد بھی فائنل الیون کا حصہ ہیں۔

سری لنکن ٹیم کی قیادت چریتھ اسالانکا کر رہے ہیں جب کہ دیگر کھلاڑیوں پاتھم نیسانکا، کوسال مینڈس، کوسال پریرا، داسن شناکا ٹیم میں شامل ہیں، کامیندو مینڈس، چمیکا کرونارتنے، مہیش تھکشانا، وانندو ہسارنگا، دشمانتھا چمیرا اور نوان توشارا پلیئنگ الیون کا حصہ ہیں۔

یہ میچ دونوں ٹیموں کے لیے نہایت اہم ہے کیوں کہ سپر4 مرحلے میں فتح ٹورنامنٹ کے فائنل تک رسائی کے امکانات کو مضبوط کرے گی۔ شائقین کرکٹ کی نظریں خاص طور پر پاکستانی بولنگ اٹیک اور سری لنکن بلے بازوں کی کارکردگی پر جمی ہوئی ہیں۔

ایشیا کپ کے فائنل تک رسائی کی امیدوں کا زندہ رکھنے کے لیے گرین شرٹس اور لنکن ٹائیگرز کو اپنے اگلے دونوں میچز جیتنا ہوں گے تاہم کسی ایک میچ میں بھی شکست کی صورت میں اگر مگر کا کھیل شروع ہو جائے گا یا ایونٹ میں اس کا سفر تمام ہو جائے گا۔

سپر فور مرحلے میں موجود چاروں ٹیموں کے پاس فائنل میں کوالیفائی کرنے کا موقع ہے، کوئی بھی ٹیم ایک میچ کی کامیابی پر بھی فائنل میں پہنچ سکتی ہے۔

ریکارڈز کے مطابق پاکستان نے ابوظہبی میں 9 میں سے 7 ٹی 20 میچ جیت رکھے ہیں جن میں 3 کامیابیاں سری لنکا کے خلاف ہیں۔ تاہم سری لنکا نے اسی میدان پر حالیہ دنوں میں بنگلہ دیش اور افغانستان کو شکست دی ہے اور کنڈیشنز کا فائدہ اٹھا سکتا ہے۔

تمام تر عوامل کو دیکھتے ہوئے آج کا یہ میچ نہایت سنسنی خیز ہونے کا امکان ہے اور یہ مقابلہ دونوں ٹیموں کی ایشیا کپ فائنل تک رسائی کا فیصلہ بھی کر سکتا ہے۔

یاد رہے کہ سپر فور مرحلے میں پاکستان اور سری لنکا کو اپنے پہلے میچ میں شکست کا سامنا کرنا پڑا تھا، گرین شرٹس کو بھارتی ٹیم نے 6 وکٹوں سے ہرایا جب کہ بنگلادیش نے دلچسپ مقابلے بعد سری لنکا کو 4 وکٹ سے شکست دی تھی۔