بشریٰ بی بی کا عمران خان کے سرکاری فیصلوں پر روحانی اثر، برطانوی جریدے کی رپورٹ میں انکشاف – Pakistan

برطانوی جریدے “دی اکانومسٹ“ نے پاکستان تحریک انصفا (پی ٹی آئی) کے بانی اور سابق وزیراعظم عمران خان کی اہلیہ بشریٰ بی بی پر خصوصی رپورٹ جاری کی ہے، جس میں ان کے سیاسی اثر و رسوخ اور سرکاری فیصلوں پر مداخلت کے دعوے کیے گئے ہیں۔ جریدے کے سینئر صحافی اوون بینیٹ کی رپورٹ میں بتایا گیا ہے کہ بشریٰ بی بی اہم تقرریوں اور سرکاری فیصلوں میں اثرانداز ہونے کی کوشش کرتی تھیں اور بانی کی فیصلہ سازی پر روحانی مشاورت کا رنگ نظر آیا ہے۔

رپورٹ کے مطابق، عمران خان اور فوج کے تعلقات 2021 میں خراب ہونا شروع ہوئے، جب انہوں نے آئی ایس آئی کے نئے سربراہ کی تعیناتی پر حمایت سے انکار کیا۔ اس دوران عمران خان ’فرح گوگی‘ پر اعتماد کرنے لگے، جو ان کی اہلیہ بشریٰ بی بی پر اثرانداز تھیں۔

رپورٹ میں دعویٰ کیا گیا کہ فرح گوگی نے وزیر اعظم تک رسائی حاصل کی اور بعض الزامات کے مطابق حکومتی عہدوں پر تقرریوں اور کنٹریکٹس پر بھی اثرانداز ہوئیں۔

رپورٹ کے مطابق، بشریٰ بی بی کی شخصیت اور ان کے اثر و رسوخ نے بعض حلقوں میں شکایات کو جنم دیا کہ وہ سرکاری معاملات میں غیر ضروری دخل اندازی کرتی تھیں۔

عمران خان کے مخالفین کا دعویٰ تھا کہ گوگی اور بشریٰ بی بی کا ایک ”روحانی کارٹیل“ وزیر اعظم کو کنٹرول کر رہا ہے اور وہ خوابوں و بصیرت کے مطابق فیصلے کر رہے ہیں۔ لیکن خان کے حامی بشریٰ بی بی کو ایک روحانی رہنما سمجھتے تھے جو مشکل وقت میں ملک کی رہنمائی کر رہی ہیں۔

جریدے نے اس بات کی طرف بھی اشارہ کیا کہ بشریٰ بی بی کا سیاسی اور روحانی اثر صرف پارٹی سطح تک محدود نہیں رہا بلکہ انہوں نے بعض اوقات حکومت کی اعلیٰ سطحی تقرریوں اور پالیسی فیصلوں پر بھی اثر ڈالا۔

اسی رپورٹ میں پاکستان کے سیاسی حالات کی پیچیدگیوں کو بھی اجاگر کیا گیا ہے۔

رپورٹ میں بتایا گیا ہے کہ سابق وزیراعظم عمران خان کی حکومت اور فوج کے درمیان تعلقات میں تناؤ، بشریٰ بی بی اور ان کے روحانی مشیر کے کردار سے مزید پیچیدہ ہوگیا۔ عمران خان کی سیاسی پوزیشن، فوج کے ساتھ تناؤ، اور ان کی گرفتاری کے بعد ملک کی سیاسی صورت حال پیچیدہ اور متنازع رہی۔

رپورٹ میں یہ بھی ذکر کیا گیا کہ بشریٰ بی بی اور ان کے مشوروں کی موجودگی نے بعض حلقوں میں وزیراعظم کے فیصلوں کو خوابوں اور روحانی رہنمائی کی بنیاد پر ہونے کا تاثر دیا، جبکہ ان کے حامی انہیں ایک رہنمائی فراہم کرنے والی شخصیت کے طور پر دیکھتے تھے جو مشکل حالات میں ملک کی سمت درست کرنے میں مددگار ثابت ہو رہی تھیں۔