مشی گن میں چرچ کے اندر فائرنگ، متعدد افراد ہلاک و زخمی – World

امریکی ریاست مشی گن کے چرچ میں فائرنگ سے متعدد افراد ہلاک اور زخمی ہو گئے، حملہ آور نے چرچ کی عمارت کو بھی آگ لگا دی جس سے وہاں خوف و ہراس پھیل گیا۔

پولیس کے مطابق فائرنگ کے بعد حملہ آور کو ہلاک کر دیا گیا ہے اور اس وقت علاقے میں عوام کے لیے کوئی خطرہ نہیں ہے۔

فائرفائٹرز موقع پر پہنچ کر چرچ میں لگی آگ پر قابو پانے کی کوشش کر رہے ہیں جبکہ سوشل میڈیا پر گردش کرتی ویڈیوز میں چرچ سے اٹھتے دھوئیں اور پہنچے ہوئے ایمرجنسی اہلکاروں کو دیکھا جا سکتا ہے۔

گرینڈ بلینک ٹاؤن شپ پولیس نے شہریوں سے اپیل کی ہے کہ وہ جائے وقوعہ سے دور رہیں تاکہ امدادی کارروائیاں بغیر کسی رکاوٹ کے جاری رہ سکیں۔

واقعے کے زخمیوں کو قریبی اسپتالوں میں منتقل کر دیا گیا ہے جہاں ان کا علاج جاری ہے۔ حملے کی وجوہات معلوم کرنے کے لیے تحقیقات شروع کر دی گئی ہیں۔