سعودی دارالحکومت میں امریکی سفارت خانے پر ڈرون حملے – World

سعودی عرب کے دارالحکومت ریاض میں امریکی سفارت خانے کو دو ڈرونز نے نشانہ بنایا ہے۔ سعودی وزارتِ دفاع نے حملے کی تصدیق کرتے ہوئے بتایا ہے کہ عمارت کو معمولی نقصان پہنچا ہے تاہم کسی جانی نقصان کی اطلاع نہیں ملی۔

سعودی وزارتِ دفاع نے تصدیق کرتے ہوئے بتایا ہے کہ منگل کی صبح ریاض میں واقع امریکی سفارت خانے پر دو ڈرونز سے حملہ کیا گیا، جس کے بعد سفارتی کمپاؤنڈ میں آگ بھڑک اٹھی۔

بیان کے مطابق حملے کے بعد لگنے والی آگ محدود پیمانے کی تھی اور عمارت کو معمولی نقصان پہنچا ہے۔

برطانوی خبر رساں ادارے رائٹرز کے مطابق حملے کے بعد ریاض کے ڈپلومیٹک کوارٹر سے سیاہ دھواں اٹھتا دیکھا گیا، جہاں مختلف ممالک کے سفارتی مشن قائم ہیں۔

رپورٹ کے مطابق عینی شاہدین نے بتایا کہ انہوں نے ایک زور دار دھماکے کی آواز سنی اور سفارت خانے کی عمارت سے شعلے بلند ہوتے دیکھے۔